Puisi Para: Geguritan

Puisi Jawa

Apa ta puisi Jawa iku? Apa bae kang kalebu puisi Jawa? Tulisan iki ngrembug babagan puisi Jawa, yaiku puisi para. 

Puisi Jawa bisa kapantha dadi loro, yaiku puisi para (tembang para) lan puisi yasan (tembang yasan). Paugeran ing puisi para luwih sederhana lan ora duwe pupuh. Puisi yasan utawa tembang yasan aturan puisine luwih sampurna utawa apik, asil anggitane para pujangga utawa sastrawan (Samidi, 2010: 91).

Miturut pamanggihipun Samidi (2010: 91) tembang para dipantha dadi telu, yaiku:

1. Parikan

Parikan ana loro, sing kapisan yaiku parikan kang dumadi saka rong gatra utawa baris (parikan tunggal). Sing kapindho yaiku parikan kang dumadi saka patang gatra utawa patang baris (parikan rangkep). Dene ing kamus Baoesastra Djawa (1939: 473), parikan yaiku (1) sesindhenan utawa tembangan mung rong ukara nganggo purwakanthi swara, umpamane abang-abang ora legi, tiwas magang ora dadi; (2) ukara kang nganggo tetembungan wangsalan, umpama ora ngapem landa (ora ngreti, roti).

Tuladha parikan:

a.       Wedang bubuk, gula Jawa

Yen kepethuk, ati lega

b.      Sepet-sepet sawone mentah

Diempet-empet selak ra betah

c.       Yen kembang-kembange kacang, dudu kembange puspa nyidra

Sih cilik dikudang-kudang, bareng gedhe gawe rekasa

d.      Manuk emprit, menclok godhong tebu

Dadi murid, sing sregep sinau

e.       Tawon madu ngisep sekar

Dadi guru kudu sabar

2. Gendhingan

Gendhingan  yaiku uni swara gamelan utawa ngowahi tembang dadi swara gendhing utawa gamelan (Samidi, 2010: 92).

Tuladha gendhingan:

a.       Kembang-kembang nipah,

sumebar satengah sawah,

dongong bae ing pancake,

kedhep tesmak pamandenge,

pratandha gedhe melike,

kakang Januraga.                    

b.      Pupus-pupus tebu,

den udut kukuse mambu,

glegas-gleges pangrimuke,

kedhekesan palungguhe,

watak tan sabar karepe,

kakang Januraga

3. Geguritan

Miturut Samidi (2010: 92) geguritan kalebu puisi bebas utawa puisi kontemporer. Puisi iki ana miturut jamane utawa sawetara (ora suwe).

Miturut Hartono (Sabrina & Nugroho, 2016: 36-37) geguritan yaiku “tembung-tembung rinakit mawa rasa (gurit), ora mung waton nyuntak rasapangrasa, ora mung wadhage kang wujud (tipografi) saemper guritan nanging tumrape wong kang wus atul utawa kulina maca guritan, bakal enggal katitik, apa kang lagi diadhep (diwaca) iku nyata-nyata guritan, apa mung ‘pawarta’ kang tembung-tembunge ditata dadi larik-larik saemper guritan”. Miturut Sumarlam (Puspita, 2017) geguritan (puisi Jawa modern/kontemporer) ora kaiket dening guru lagu (uni vokal saben akhir baris) kaya macapat, lan uga ora kaiket dening “metrum” kaya kakawin. Geguritan relatif luwih longgar/bebas dibandhingkake karo loro puisi liya.

Tuladha geguritan:

Dwija

Parak esuk umun-umun

Mbrengkut mbentoyong ngindhit gawan

Kekanthen...

Sedya tulus ninggal gubug reyot

Ora sumangkeyan

Golong gilig gegaman geguritan mbabar jantraning urip

Ingaran...

Labuh-labet leladi lestarine lingsa

Peparab endah

Kaindhit rina wengi

Nggayuh asma luhur

Trekah kautaman kakanthi

Nora keri amati dhiri

Linebur nyawiji

Kasuntak wujud kridha sayekti

Ora kena lena

Amarga...

Ngreksa thukulan jati mas

Ora sabaene

Apa aku ya bisa nggayuh asma iku?

Biyuh-biyuh...

Kaya dom sumurup ing banyu

Yen kelakon abot pitakone

(Kapethik saka Majalah Panjebar Semangat edisi 33, 18 Agustus 2018 kaca 40)

Ing ngisor iki tuladha liya ngenani geguritan, yaiku maca geguritan. Mangga disemak geguritan ing ngisor!

sumber: https://www.youtube.com/watch?v=-yfW30sRdF0

Iku mau sethithik jlentrehan ngenani puisi para yaiku geguritan. Kaajab tulisan iki bisa mbiyantu nambahi wawasan ngenani geguritan. Matur nuwun.

Daftar Pustaka:

Harnoko, Sri. (2018, 18 Agustus). Dwija. Panjebar Semangat, 33, hlm 40.

Nuraini. Pepak Basa Jawa. Surakarta: Lingkar Media.

Poerwadarminta. (1939). Baoesastra Djawa. Batavia: J.B. Wolters Uitgevers Maatschappij Groningen.

Samidi. (2010). Basa lan Kabudayan Jawi. Surakarta: LPP UNS dan UNS Press.

Puspita, O. W. (2017). Upaya Meningkatkan Keterampilan Menulis Geguritan Berdasarkan Cerkak Melalui Penerapan Metode Mind Mapping (Peta Pikiran) (Versi Elektronik). Jurnal Ilmiah Lingua Idea, 6(2), 98-113. Diperoleh pada 4 Januari 2019 dari http://jos.unsoed.ac.id/index.php/jli/article/view/492

Sabrina, F. R. M., & Nugroho, Y. E. (2016). Penerapan Model Explicit Instruction

untuk Pembelajaran Membaca Indah Geguritan Siswa Kelas VII SMP Negeri 39 Semarang (Versi Elektronik). Lingua, 12(1), 35-43. Diperoleh pada 4 Januari 2019 dari http://journal.unnes.ac.id/nju/index.php/lingua/article/view/8690